بطاطا بالكريمة من غير سلق ولا شوي 

وصفات سوزان فؤاد

لو بتحبي البطاطا بالكريمة، جربي الطريقة دي ومش هتحتاجي تسلقيها ولا تشويها تاني!

يعني من غير سلق البطاطا في مية كتير، ومن غير ما تشويها، والنتيجة تحفة

وصفة تكفي 6 أفراد

فوائد البطاطا

البطاطا مصدر جيد للألياف والكربوهيدرات التي تمد الجسم بالطاقة، كما تحتوي على فيتامينات ومعادن مهمة من أبرزها فيتامين A وفيتامين C والبوتاسيوم. وتساعد الألياف الموجودة فيها على دعم صحة الجهاز الهضمي والشعور بالشبع.

المقادير

للبطاطا:

– كيلو ونصف بطاطا

– ¾ كوب سكر

– كوب ماء

– مكعب زبدة

– 3 ملاعق كبيرة جوز هند

– فانيليا

للكريمة:

– 4 ملاعق كبيرة زبدة أو سمنة

– 4 ملاعق كبيرة دقيق

– لتر حليب

– ½ كوب سكر

– فانيليا

طريقة التحضير

قشري البطاطا واغسليها جيدًا، ثم قطعيها قطعًا متوسطة ومتقاربة في الحجم عشان تستوي كلها مع بعض.

حطي البطاطا في حلة، وضيفي عليها السكر والماء ومكعب الزبدة

غطي الحلة وحطيها على نار هادية، وسيبيها تستوي براحة.

ملحوظة: ما تعليش النار لأننا عايزين البطاطا تستوي واحدة واحدة وتشرب من خليط السكر والزبدة.

كل شوية افتحي الحلة وقلبي البطاطا بهدوء جدًا عشان القطع تفضل محافظة على شكلها وما تتحولش لهريس.

لما البطاطا تطرى وتستوي ويكون في قاع الحلة خليط حلو وتقيل شوية ضيفي جوز الهند والفانيليا وقلبي بخفة

تحضير الكريمة

في حلة تانية حطي الزبدة أو السمنة على نار متوسطة

لما تسيح ضيفي الدقيق وقلبي لمدة دقيقة تقريبًا لحد ما الدقيق يتشرب الزبدة ويتجانس معاها

بعدها ابدئي ضيفي الحليب تدريجيًا مع التقليب المستمر بالمضرب اليدوي

ما تنزليش الحليب كله مرة واحدة نزليه شوية شوية مع التقليب عشان الكريمة تطلع ناعمة ومن غير تكتلات

ضيفي السكر والفانيليا وكملي تقليب على نار متوسطة لحد ما الكريمة تتقل ويبقى قوامها كريمي وناعم.

لما توصلي للقوام المطلوب ارفعيها من على النار.

التجميع

هاتي طاجن فخار مناسب للفرن وادهنيه بطبقة خفيفة من الزبدة

رصي فيه قطع البطاطا بهدوء وخليها متوزعة بشكل مرتب وواضح

ما تهرسيش البطاطا خلي قطعها باينة وشكلها حلو.

صبي الكريمة كلها على الوش ووزعيها بظهر المعلقة أو سباتيولا بحيث تغطي البطاطا بطبقة متساوية

زيني الوش برشة بسيطة من جوز الهند، وممكن تضيفي كام حبة مكسرات أو رشة قرفة لو متوفرين عندك عشان شكل الطاجن يبقى شيك وشهي

دخلي الطاجن فرن سخن مسبقًا والهدف هنا مش تسوية البطاطا لأنها استوت خلاص إحنا بس عايزين الكريمة تمسك وتاخد لون دهبي حلو من الوش

أول ما الوش يتحمر باللون اللي تحبيه طلعيه من الفرن.

سيبيه يهدى شوية قبل التقديم عشان الكريمة تتماسك وبعدها قدميه في نفس الطاجن على سفرة مرتبة مع تزيين بسيط برشة جوز هند أو مكسرات على الوش

النتيجة: طاجن بطاطا بالكريمة والمكسرات ناعمة ووش دهبي محمر تقديم شيك وطعم بيتي فخم من غير خزعبلات

صحتين وهنا مع وصفات سوزان فؤاد